ԿԱՌՈՒՑՈՒՄ ԵՆՔ ԲՈԼՈՐՈՎ
Սոցիալական ձեռներեց Ռուբեն Վարդանյանի նախաձեռնությամբ Դիլիջանում կառուցվող նոր եկեղեցին կծառայի թե՛ որպես հոգևոր կենտրոն, և թե՛ որպես մշակութային վերածննդի խորհրդանիշ: Այն կարևոր դեր կստանձնի քաղաքի համայնքային, մշակութային և կրթական կյանքի զարգացման մեջ:
Եկեղեցին նախագծվել է հայտնի ճարտարապետ Մաքսիմ Աթայանցի կողմից բարեգործական հիմունքներով: Բարեգործական նվիրատվություններով կառուցվող եկեղեցու շենքն իր կահավորանքով և գույքով կհանձնվի Հայ Առաքելական Եկեղեցուն և կանցնի վերջինիս կանոնական ու հովվական իրավասության ներքո:
Թեև Դիլիջանում պատմականորեն բազմաթիվ եկեղեցիներ և վանքեր են գործել, քաղաքն ավելի քան կես դար զրկված է եղել հոգևոր կենտրոնից: Ներկայում հավատացյալները հավաքվում են Հին Դիլիջան հյուրանոցային համալիրում հատկացված տարածքում: Նոր եկեղեցին նշանակալից ավելացում կլինի Դիլիջանի մշակութային և հոգևոր կյանքում:
Տեղակայված լինելով Աղստև գետի ափին՝ եկեղեցին քաղաքի կենտրոնական հատվածի զարգացման ծրագրի անբաժանելի մաս է: Դիլիջանի շուրջ 19 000 բնակիչների հոգևոր կարիքները հոգալուն զուգահեռ ծրագիրը նաև կնպաստի գետափնյա հատվածի բարեկարգմանը՝ գեղեցկացնելով հետիոտներին հարմարացված, ծառածածկ գոտիները, որոնք այս եզակի առողջարանային քաղաքի դիմագիծն են:
