Դիլիջանի համայնքային կենտրոն (DCC) 

Դիլիջանի համայնքային կենտրոնը (ԴՀԿ) հիմնադրվել է 2014 թվականին բարերարներ Ռուբեն Վարդանյանի և Վերոնիկա Զոնաբենդի կողմից։ 

2020 թվականի հունիսին Կենտրոնն ամրագրել է իր ներկայությունը  Դիլիջանում՝ որպես «Դիլիջանի համայնքային կենտրոն» ՀԿ՝ ամրապնդելով համայնքի բարեկեցությանն ուղղված գործունեության  իր hանձնառությունը:  «Դիլիջանի համայնքային կենտրոն» ՀԿ-ի հիմնադիր անդամներն են՝ UWC Դիլիջան միջազգային դպրոցը, «Սքոլաե Մունդի Արմենիա» բարեգործական հիմնադրամը և «Հայաստանի զարգացման նախաձեռնություններ» բարեգործական հիմնադրամը։ 

2021թ․-ի հունվարին Դիլիջանի համայնքային կենտրոնը դարձավ «Դի-Վի-Վի Ինթերնեյշնալ»-ի  մեծահասկաների կրթության 4-րդ կենտրոնը Հայաստանում՝  հայտնելով իր պատրաստակամությունը  համագործակցելու մեծահասակների ոչ ֆորմալ կրթության ոլորտում։ Կենտրոնը կիսում է «Դի-Վի-Վի Ինթերնեյշնալ»-ի այն  համոզմունքը, որ մեծահասակների ոչ ֆորմալ կրթությունը խթանում է մարդկանց մասնակցությունը մշակութային, սոցիալական և տնտեսական գործընթացներին, ինչպես նաև կայուն զարգացանը ու աղքատության նվազեցմանը։  

2022թ․-ի հոկտեմբերին Դիլիջանի համայնքային կենտրոնը՝ համագործակցելով ՀՀ Տավուշի մարզի մարզպետարանի հետ և  հավատարիմ մնալով համայքնի համաչափ զարգացմանն ուղղված իր առաքելությանը, Դիլիջան բազմաբնակավայր համայնքի Աղավնավանք գյուղական բնակավայրում հիմնել է իր առաջին մասնաճյուղը։ 

Մասնաճյուղը գործում է Աղավնավանքի հիմնական դպրոցում՝ նպաստելով պետություն-մասնավոր համագործակցության ամրապնդմանը։  

2023թ․-ի հոկտեմբերին Դիլիջանի համայնքային կենտրոնը՝ համագործակցելով ՀՀ Սյունիքի մարզի Տաթևի համայնքապետարանի հետ  հիմնել է իր երկրորդ մասնաճյուղը Տաթև համայնքի Հալիձոր գյուղական բնակավայրում։ Տաթևի  համայնքային կենտրոնը հիմնվել և գործում է «Ռուբեն Վարդանյան» հիմնադրամի աջակցությամբ։ 

Դիլիջանի համայնքային կենտրոնը գիտելիքի փարոս է, դրական փոփոխությունների դարբնոց, որի հյուրընկալ, աջակցող ու ներառող միջավայրի շնորհիվ յուրաքանչյուր ոք իրեն զգում է գնահատված ու հարգված, ունի սեփական ներուժը բացահայտելու և այն իր անձնական և մասնագիտական աճի, ինչպես նաև  համայնքի զարգացմանն ուղղելու հնարավորություն՝ այսպիսով նպաստելով ակտիվ համայնքի ձևավորմանը։ 

ԴՀԿ-ի առաքելությունն է ձևավորել գիտելիքահեն, մասնակցային, ներառական և ակտիվ համայնք՝ հզորացնելով համայնքի ներուժը և խրախուսելով ցկյանս ուսուցումը։